the Christmas-time in Hawaiiiiii

Jetzt simmer scho es paar tägli da im norde vode oahu-insle. de mitem surf-turnier isch au na super gsi: wils so gueti welle gha häd, händs das turnier grad i eim zug chöne durefüehre und das isch denn zu euisem pech worde. am erschte tag hämer wie verruckt das turnier gfunde, mir händ na surfer gfunde und au d'fotographe - aber s'turnier isch halt eifach verbi gsi. de norde isch aber au susch mega schön, vor allem s'hostel womer sind - mit familieaschluss. es isch wie wämer da es hüüsli für euis häted und euisi wg-mitbewohner wär denn e patch-work-familie mit zwei buebe wo aktiv sind wie nüt. vorgester händs en chrebs gfange und schnell als huustier umfunktioniert. er häd jeff gheisse :-) mittlerwiile häder wieder freiheit erlangt...

d'sandra häd chli pech gha mitem flug vo edmonton uf honolulu. ich hansi denn in vancouver sozäge überholt und mir händ es lustigs foti gmacht. si häd denn d'nacht in los angeles verbracht und ich in honolulu. det hani au s'höchschtmass a penner je i mim lebe gseh. und vor allem sinds all scho super früeh is "bett" so dassi denn zwüsched ihne dure min weg han müesse bahne woni öpis bin go znacht ässe - krass!


ok und jetzt da ufde oahu-insle simmer chli mit euisem mietauto am umecruise. wasmer super im griff händ, isch di guete restaurant finde - richtigi perle hämer gfunde bis jetzt! mitem wetter hämers chli weniger im griff. gester simmer zum sandy beach gange zum bispil, händ euisi siebe sache uspackt, sind aneglege, afange läse und scho häds afah regne! woruf mer wieder alles händ chöne zämepacke und es nächschts örtli sueche... da hämer jetzt na e nacht verlängeret und jetzt wär de plan go schildchrötli schnorchle :-)

morn würdemer uf maui flüge, zwei nächt in lahaina pfuuse, en tagesusflug ufd molokai-insle und denn die letschte 5 nächt in kihei. au det hämer natürli wieder es mietauto, nur scho wägem schöne nummereschild wos da händ :-)

wasmer immer wieder chli vergässed isch, dass ja wiehnachtsziit isch. aber si gäbed sich immer ganz müeh, dasmer dradenked, d'wiehnachtsdeko isch teilwiis recht gigantisch und laht euis bzw. euises auto immer wieder zmitzt ufde strass ahalte, dasmer chönd es föteli schüsse :-)

ah ganz rekordverdächtig isch au, dasmer chum simmer acho im hostel scho di erscht iladig gha händ zum mit es paarne anes lagerfüürli am strand chli go höckle. de sternehimmel isch doch es rechts prachtswerch da. und dass hawaii en regeboge ufde auto-nummereschilder häd chunt au nöd vo irgendwo. ich glaub mir händ ufghört zelä wie viel regeböge mir scho gseh händ.

und jetzt wünschi allne ganz schöni wiehnachte - mit herzlichem dank a mini "video-produzentin d'sandra" - chani da wieder es video zur verfüegig stelle, di wiitere mittänzer dasmal sind de (one and only) buffalo bill, de hund vom hunderestaurant in edmonton und denn na euisi "lieblingsmaske" vo halloween. glichziitig wär das wahrschinli au min letschte post gsi vo dere reis, truurig aber wahr usser es passiert na öpsi gaaaanz spannends... ;-) ich denke aber de blog wird bald wieder aktiviert, hani ja doch jetzt wieder ganz viel möglichkeite und ideä für witeri reise - fernweh wird nöd besser mit reise, mer chunt nur immer meh ufde gschmack :-)) keis wunder bi dene schöne landschafte!!

the goodbye

aaaaaachtung mached eui gfasst ufen sentimentale biitrag! the time is over...
und natürlich gits dezue es passends foti:-)

jaja, de abschied hämer natürli richtig zelebriert, am samschtig hämer geburtstag gfiiret vo 3 internationale mitstudente und glichziitig na e abschiedssause. leider häd min wintermantel chli müesse draglaube, hani schnell nüm so lustig gfunde, aber jetzt scho wieder vergässe und vergäh. und hüt isch jetzt würkli na abschied gsi und bi de einte tuetmers halt na chli länger usezögere und de abschied chunt denn morn :-(

was natürli na chunt sind di zwei wuche hawaii. d'sandra und ich händ beschlosse getrennt zflüge, dasmer euis denn det wieder öpis zverzelle händ - haha, nei seich :-) ah übrigens, da falltmer grad i, han ghört, da seiged na es paar frage ume zu euisne aktivitäte womer mängisch so mached. chönd alles frage woner wänd und wenns guet chunt, wirdi antworte, gell manu. und grad namal öpis: ich bin chli in verzug mit mails und sms beantworte, ich wirde das natürli so schnell wie möglich gwüssehaft erledige, wenni denn chli usem tüüf dusse bin, aso das heisst in hawaii...

suschtigi neuigkeite, hmmm, en zweite koffer hani müesse poschte... s'zimmer putze und ufruume macht kei freuid... ich han vorher s'letscht mal öperem chöne verzelle, ich seig vo russland... was machtmer eigentli in hawaii mit winterchleider?!? hmm ah ja und da hädmer d'sandra na es video gmacht.

da hani na es schuelföteli:

und na eis, wos richtig chalt gsi isch und wo min mantel na ganz gsi isch:

wenni morn zwüschedem putze na ziit han, tueni nachli meh mitteile. und susch chönder eui chli mitem video vergnüege. di andere zwei sind übrigens euisi ecuador-connections.

adee adee & bis bald

the uniforms

Hmmmm ja, ich han scho lang lang wele schriebe, aber d'Ziit wird langsam chli knapp da, mir händ euis scho überleit, ebmer en 2-wuche-plan seled ufstelle, dasmer na alles chönd erledige womer wänd.

es isch wieder viel los gsi, aktuell hani au na e gschicht z'verzelle, wo uf mini choschte gaht, aber dadezue spöter :-)

letscht wuchenend simmer jetzt ebe det in marmot basin gsi, nächi jasper. und denn häd sich wieder bestätiged wasi da eifach so absolut liebe: chli umeverzelle, dasmer skichleider wet uslehne und scho klappet das! und de schnee, das chamer sich gar nöd vorstelle. ich weiss, das isch jetzt nöd nett vo schnee z'schriebe. aber am sunntig häds de ganz tag gschneit und es häd so tüüfschnee anegleit, dasses euis allne sooo egal gsi isch, dassmer u mega nass worde sind mit de ziit. sogar de moro - de mexikaner - häd dureghebet. mich händs einisch müesse liecht go usgrabe usem tüüfschnee, bin doch chli inere schwierige situation gsteckt :-) aso sägemers so, ich hamer denn mit de schiistöck vom daniel chöne helfe, aber selbst die sind bis zu dem teil womer sich chan hebe im schnee versunke. und das alles sozäge ufde piste! wasmer euis eifach de ganz tag nie überleit händ, wenn d'skipiste so voll schnee sind, gsehnd evtl. d'strasse au ähnlich us. ich bin chli dur mini zwiespältigkeit ufgfalle - vor doppeldiamant-schwarze-piste (oder wie die gheisse häd) nöd mit de auge zwinkere, aber denn bi dene strasseverhältnis fasch in ohmacht falle... ihm hotel häd sich au na chli e lustigi gschicht ereignet: d'sandra und ich sind da offiziell d'mamis (ufgrund vo alter und sozialem verhalte und evtl. seriosität...), s'zimmer hämer mit de beide franzosinne teilt und am samschtig abig womer zrugg is hotel cho sind, isch doch tatsächlich nur s'bett vode müettere gmacht gsi, vor allem händs sich bi euisem bett würkli mega müeh gäh, händ mir glachet :-))

ok und denn di beide uniform-stories. letscht donschtig, wenni mi nöd tüsche oder zischtig, am morge früeh isch de alarm los gange. de kennemer ja scho vo de füürüebig womer mal gha händ und mir händ euis scho gfraget, ebs ächt namal e üebig git oder nöd. uf jede fall ja, evakuieremer halt die 13. Stöck vo de Residenz namal (zum glück bini im 1. stock, man bemerke: im notfall gaht natürli de lift au nöd, aso im dümmschte fall 13. stöck stege laufe...). D'Anita isch prompt dur di falsch tüür usegloffe ide morgemüedigkeit, de häds grad namal piipsed, aber niemmer häds gmerkt, huuuch :-) und denn was euis chli verunsicheret häd isch, dass s'füürwehrauto inkl. füürwehr det gstande isch (s'rosarote auto kenneder ja scho!). hani na en churze moment a mim laptop umegstudiert wo ja na im zimmer bliebe isch. uf jede fall da drus hämer gschlosse, dasses e grösseri üebig isch und händ de starbucks agstüüret. womer zrugcho sind hämer wieder inechöne. im verlauf vom tag isch denn uscho, dass eine bide wasser-sprinkler-alag im zimmer (aso sprützt wasser im notfall) chleider oder susch was ufghänkt häd und dass denn e chlineri fluet usglöst häd im 8. stock und SELBSTVERSTÄNDLICH drum s'ganze huus muess evakuiert werde. häd denn immerhin na es schöns föteli gäh! (naja isch halt bewegig dinn...)


und denn aber na das, isch zwar umstritte ebs schön isch - mir gfallts :-) isch ufem weg id schuel...

ok, und denn wilmer nani gnueg uniforme gseh händ, hämer am samschtig abig, womer so elend lang dusse händ muesse warte bismer i euisi bar inecho sind, na polizischte atroffe. ich han wie immer wele es heimlichs föteli mache fürd vivi und denn häd aber eine vode südamerikanische gspänli - wo immer so guet zu euis lueged - gfraget, ebmer es föteli mitne döfed mache. ich weiss isch nani spannend und die gschicht endet au nöd guet für mich. wiiiiil: er häd natürli mitem argument gfraget, dasmer nöd vo kanada seiged und so wiiter. denn häd de polizischt gfunde, mir müessed e ID oder so zeige, wasi au han wele mache, aber woni de erscht satz gseit han, häder so gfunde: "ou nei, isch guet, de akzent seit alles!" oder i dem stil, hahahahaha. so viel zu mine englisch-fortschritt, defür au da wieder es schöns föteli!

jetzt hani langsam chli es foto-überagebot, aber na viel zum zeige eigentlich. ja nu, mir müend ja au na öpis z'rede ha, wenni dihei bin ;-) aber vilicht na es foti vom gröschte edmonton oilers fan:

oder d'swiss twins im usgang:

oder au bim snowboarde:

ja und wie d'zuekunft vo mim blog usgseht, wird sich zeige. ich glaubs di sentimental phase vo euis allne ustuuschstudente isch iglüütet, di letschte zwei wuche sind abroche. mal luege wie mini verfassig usgseht, hehe. hüt simmer na di über-romantisch wiehnachtsbelüchtig bim legislatur-gebäude go aluege, woni au plötzli schön gfunde han - das verspricht nüt guets. statt glüehwii häds heissi schoggi gäh - uf de strass wird ja kei alkohol trunke, susch gits denn wieder es rendez-vous mit dene beide herre witer obe...

zum schluss na di guet nachricht, dasses scho dezember isch - de movember isch verbi ;-)
(ich hoffe, i dem zämehang ischs glich na ok, dasi am rob sis föteli han döfe bruche, aber ich han jetzt ein monet lang under em ablick vo sim schnauz müesse liide, hihi)

soooooo defür ischs en lange biitrag worde, hoffentlich hilfts chli für de mäntig-morge... bis balde :-)
.

the key learnings

D'Sandra und ich händ e "chliini" Zämefassig vo de bisherige Ziit da gmacht und di wichtigste Sache womer glernt händ bzw. wo seted glernt werde ufgschriebe. Sind leider ja scho öpe 3/4 vode Ziit verbi...

Schwiiz und Schwede isch nid/nöd s’gliche und wämer vode Schwiiz chunt, redtmer au nid/nöd Schwedisch.

Mir sind nid/nöd vo Russland.

Ja, mir wüssed jetzt denn, dases na viel chälter wird und ja, ir Schwiiz isches au chalt, aber nöd sooo chalt.

Wiso hets eigentlech überhoupt ä Tüüre zwüsche de WC-Kabinene wemä eh dürä gross Abtrennigsspalt gset?

Mittwuch isch Wings Night!!!! Jabadabadoooo!

Mails muessmer nöd beantworte vor allem nid/nöd, wenns um Terminafrage oder um Feedback gaht.

Ja, mir wüsse, es wird na viiiiiieeel chälter hie/da.

Gruppearbeit heisst: Jede sitzt det und schafft für sich selber, im beschte Fall mached all s’gliche, eifach einzeln…

Schwiizerinne seted under kei Umstände s’vollständig zämägsteute Dokument vonere Arbet übercho (di elektronischi Version heisi no hüt nid gse…).

Anschinend chanmer während em Unterricht schlafe, während Gruppearbete oder au eifach zwüsched em lerne es Pfüüsi ufem Tisch mache.

Uf PowerPoint Folie chamer ganzi Gschichte schriebe und abläse, am liebschte gad abde Wand mitem Rügge zum Publikum.

Wämer nervös isch, sel eifach d’Ustuuschstudentin aka die Russin präsentiere.

„Wenn händer de letscht länger (1-2 Monet) Unterbruch vode Schuel gha?“ – aso weli Information wetmer sich jetzt mit dere Frag genau beschaffe?!?

Fürd Kassierin isch wichtiger mit de Chundinne rede als rechne, beliebts Thema s’Wetter, ja genau, da wird’s na viel chälter als ide Schwiiz oder susch irgendwo…

Zwei verschiedni Musig lose zur gliche Ziit isch keis Problem.

Mir sind NID/NÖD vo Russland.

Wenn de Füüralarm mit Plastik abdeckt häsch, muesch de Dampfabzug nüm alah, wennd Speck machsch. Eignet sich au guet zum de Hunger vode Mitbewohnerin z’kille.

Schwiizerdütsch und Hochdütsch isch nid/nöd s’gliche. Ja, mir sind usde Schwiiz. Ja det redmer au na Französisch oder au Italienisch.

Ok mir reded vilicht nid/nöd blitzschnell Englisch, aber wäge dem simmer nid/nöd zruggblibe!!!

Dr Old Cheddar Chäs häd d’Kriterie vode aspruchsvolle Schwiizerinne erfüllt. Es wird en grosse Produktionsüberschuss bliebe, bis de Safeway-Lade gmerkt het, dasmer nüm da sind.

Di einte chömed sehr gern zu euis go ässe, di anderä finded scho bald kei Usred me zum Iladige ablehne und es paar striited sich sogar umd Reschte.

Regelmässigi Essens-/Choch-/Aktivitätekontrolle dür Ecuador – zäck, Tüür uf, da bini wieder!

Hüt isch 10% Rabatt uf alli Ichäuf, wänder 10%? – Nei danke! ;-)

Nei det womer her sind, isch Stockholm nid/nöd grad so ide Nächi.

Vo Asie här schmöckts fein, aber nid wills selber am choche sind…es isch ikauft und wird ufgwärmt.

Holland isch echli vorluut.

Uf Ecuador muessmer immer warte, defür isch s’Gmüet sunnig.

Öschtrich isch gern ide Gruppe unterwegs.

Venezuela wot id Schwiiz cho.

E Teil vo Japan grinset wie wild, da ander Teil bis jetzt nanig – was noch nicht ist, kann ja noch werden.

China will mit de Schwiiz umd Hüüser zieh.

Zu Mexico chamer keis gmeinsams Urteil bilde. Aso mol, vilech, häd immer es netts (oder doch eher müeds?) Lächle übrig?

Frankriich macht sensationelli Crèpes.

Brasilie isch nid erwähnenswärt…

Facebook-Fründe vermehred sich rasant imne Ustuuschsemester.

Lift fahre in Kanada isch amüsant, vor allem wämer Ässware ide Händ häd.
Unterschiedlichi Chleiderkombinatione mit Pijama, Uggs, Trainerhose, Leggings, Strumpfhose sind möglich…aber nid empfählenswärt.

Churzi Hose chamer s’ganze Jahr dure alegge.

Bi Langwiili gahtmer eifach i das Zimmer, womer d’Party scho vo wiit her ghört.

En Akzent isch en Bonus!

Schön gits e SMS-Busfahrplan-Abfrag, wenn de Bus glich chunt, wäner wot.
Au „fremdi“ Schwiizerinne werded gern zunere Geburtstagsparty iglade.

…to be continued… :-)

Anmerkung der Redaktion:

- in Berndütsch würdmer na viu andersch säge als nur nid anstatt nöd, mer vezichte hie aber uf wiiteri Unterscheidige/Übersetzige bzw. en Mix vo beidne Dialekt isch doch au intressant :-)

- die teilwiis kritisch amuetende Pünkt sind natürlich liebevoll gmeint. Mir händ das Land kenne und schätze glernt. Unger anderem wills so gsprächigi, toleranti u zuvorkommendi Lüüt häd, wo na bi de isigschte Chälti nöd über s’Wetter jammered.


Und da na es Föteli, Moral vode Gschicht, in Kanada gits rosaroti Füürwehrauto ;-)

Ähhhm Maria, leider chani de Skiazug doch nöd chaufe, es isch gaaaanz "blöd" gloffe, ich chan wahrschinli Skichleider uslehne. Aber danke sowieso für de Kommentar, freuimi immer uf Nachrichte usem Schwiizerländle :-) Nächscht Wuchenend gits en Ski-/Snowboard-Usflug. Euisi Nerve werdeds bitter nötig ha (siehe Anmerkungen zu den Gruppenarbeiten...)! Aber so wies tönt wirds det en Schnauz-Wettbewerb gäh, au für Fraue mit künstliche Schnäuz oder was au immer. Tönt natürli verlockend, wenns gueti Priise git... Händer all de Hirsch scho gseh, wo sich da ide Rockies ufde Skipiste umetriebt!?! :-)

P.S. aktuelli Temperatur, Mittag am 12i: ca. -15°

.

the snow

churzi wettermeldig us edmonton: s'erschte mal schnee und langsam wirds würkli chalt...

dasi amne rodeo gsi bin, trau mi fasch nöd z'säge. drum erwähni das nur grad so churz.

e farbe-party isch au nöd grad so das woni wet gross mitteile: chunsch es farb-dösli über bzw. mueschs chaufe und chasch nachher enand amale und das ganze isch e party :-)

susch bini da grad recht beschäftigt. und wenn nöd fürd schuel, denn mit de reiseplanig für hawaii. 17. bis 20. dezember gahts anes surfturnier (als zueschauer! ;-)) ufde oahu-insle, nachher evtl. molokai und zum schluss maui...

ahja und de schrecke vom monet, movember.com: ziemlich viel schnäuz laufed da in edmonton grad ume und das na de ganz november, immerhin füren guete zweck, aber schrecklich. das erinneret mi grad dra, dasi glaubs es föteli vo mim klassegspänli muess mache. ich bliebe dra ;-)

und na e letschti randnotiz: bim erschte schnee gits au in edmonton en chlinere verchehrskollaps, unfäll und all reded über de schnee.

procrastination

ich griffe das thema vode maria churz uf und teile 5 dating-fehler mit eui (lustige artikel und allgemein lustigs magazin hani usegfunde):

1. Frauen glauben, sie verdienen mehr: Frauen bestärken einander gegenseitig darin, dass sie eine Super-Partie sind und deshalb wie geschaffen für Mr. Perfect. Sie vergessen dabei, dass auch sie Seiten haben, die ein zukünftiger Mann grosszügig übersehen muss, um sich zu verlieben.

2. Frauen halten ihre Optionen für unlimitiert: Dating funktioniert ein bisschen wie Shopping – Jede Frau hat natürlich das Recht, ewig nach der Jeans zu suchen, die den Bauch kaschiert, den Hintern in Szene setzt und nicht zu viel kostet. Aber man muss damit rechnen, dass man dieses Exemplar nicht findet. Und dass während der Suche die Jeans, die nur sehr gut, aber nicht perfekt gesessen ist, ausverkauft wird.

3. Frauen setzen die falschen Prioritäten: Nicht jedes Attribut, das auf weiblichen Checklisten erscheint, ist für eine Partnerschaft überlebenswichtig. Grösse, Haarqualität, und Muskelkraft sagen nichts über die Qualität eines Mannes als Liebhaber oder Vater oder Partner aus. Nur weil der Kandidat auf der Onlineplattform geschrieben hat, er sei ein Fan von Madonna, sollte man ihn nicht ausmustern, bevor man ihn getroffen hat. Man könnte sich vielleicht in ihn verlieben.

4. Frauen überschätzen die Romantik: Rosen, Candle-Light-Dinners, Sonnenuntergänge sind schön. Aber davon hat man weder gegessen noch sind deswegen die Kinder gewickelt.

5. Frauen wollen alles teilen: Sie interessieren sich nicht für Fussball und halten sich trotzdem für attraktiv? Sie liegen goldrichtig, aber gewähren Sie dasselbe Recht auch den Männern. Man teilt in einer Partnerschaft weder jede Sekunde noch jedes Interesse. Und das ist gut so.

Und susch gits zu dem thema nöd viel z'brichte, usser dass min ruef im sportcenter vilicht chli agschlage isch: bin mittlerwiile scho mit 5 verschiedne männer go squash spiele und s'chopfkino isch ja bi de meischte lüüt recht aktiv ;-) Da isch aber na min neuschte fang:

Drum verzelli gschieder chli vo dem wort, woni mi frage wieso, dasses nöd scho längschtens i mim aktive englisch wortschatz isch: procrastination - Aufschub oder eifach sache useschiebe. aso ich bin jetzt grad a minere arbet über interkulturelli kommunikation am schriebe. aber denn gits na eini über china zum schriebe. irgendöper wet doch sicher scho längstens mal en arbet uf englisch schriebe? oder wet öper chli sache über china lerne? naja, en versuech ischs wert gsi... :-)

Und denn häti da na "key learnings" vode sandra übers ishockey-spiel, aber das muessi es anders mal mache, susch sinds chli z'viel weisheite uf einisch ;-)

Vilicht zur zwüscheunterhaltig na euises outfit vo halloween. dummerwiis chamer au da devo wieder öpis lerne. halloween isch kein zweite schuelsilvester, wie sich das vilicht ide schwiiz das jahr chli entwicklet häd. wenn scho denn scho ischs e zweiti fasnacht. und wie ade fasnacht giltet bi de fraue "hauptsach churz". vo gruslig kei spuur, zum glück händs für das na d'sandra und mich gha, hihi :-) susch als outfit sind eher d'minnie mouse und prinzessinne und so agseit gsi. ou und lederhosen häds natürli au gha, euisi östrichische kollege händ d'lederhose mitgnah vo dihei. das heisst, ich han au na halbe mis oktoberfescht gha ;-) ich glaub aber mis lieblingsoutfit isch e banane gsi oder denn häds au wieder eine gha wie di eint figur us hangover.

vilicht müesstmer na s'bluet ums muul chli gseh:

Ah ja und denn ghöri doch, dasi im februar oder so scho wieder es schii-wuchenend han, das isch doch super!! ich gahn demfall am 25. november chli go üebe, hoffe nur es git schnee bis denn und es häd na plätz bis ich mich entschiede han zum mich amelde...:-)
muessmer na schii-chleider chaufe oder uslehne oder was au immer. und da bini doch sehr froh um de tipp vode maria :-)

irgendeinisch gits denn au wieder föteli, aber gaht so lang zum ussueche, git glaubs langsam tausende... und s'fotibuech vo mexico isch nani mal gmacht, hehe.

aaah und neiiii, jetzt bini 2 mönet da und han scho müesse en schwiizer spezialitäte-lade go ufsueche. am sunntig hämer es potluck abigässe mit de internationale studente und all müend/döfed öpis vo ihrem land mitnäh, mir händ euis natürli für raclette entschiede, wie chönts au andersch si bi mir. die koordinatorin da häd sogar es raclette-öfeli, chchchch

the slogan

drü sache weti schnell so zwüscheddure loswerde:

1.
hehe, d'sandra hädmer grad de spruch gschickt. das isch recht passend zu de wuche. mer muess dezue na säge, dasi mi scho chli anes lockerers läbe gwoehnt han und mich eigentlich da chli uf ferie in edmonton igstellt han. aber d'zämearbet mit kanadier vollziitstudente isch nöd immer ganz eifach... (s'spektrum gaht vo churz inicke während de gruppe-besprechig bis alles elei wele mache und s'endgültige dokument nöd wele userucke)




2.
und zuesätzlich namal öpis: hüt ischs jetzt langsam richtig richtig chalt - find ich! han scho min wintermantel a und am morge öpe 2 minute dusse müesse laufe. de rescht chamer alles im innere laufe, die händ sich zum glück öpis überleit... aso das heisst, ich muessmer en ultra warme mantel oder en ganz-körper-antarktisazug chaufe

3.
halloween staht vor de tüür. da mir scho es hawaii-kostüm händ, werded mir das wahrschinli chli modifiziere und gruslig mache. jetzt chömer euis endlich um das kümmere, wil prüefige und abgabetermin verbi sind. aso ideä sind natürli willkomme :-)

ah isch jetzt scho de 4. punkt, aber chuntmer grad in sinn: rezept-ideä sind au immer gern gseh, speziell schwiizerischi für gäscht oder zum irgendwo mitbringe. Potluck isch da ziemli agseit, das heisst jede nimmt eifach öpis z'ässe mit und denn wird teilt.

so, in diesem sinne, bis bald,
ich

the whales & the hot tub

ich magmi scho fasch nüm erinnere, aber vor zwei wuche muessi starte. det simmer (sandra und ich) s'verlängerete wuchenend uf vancouver. samschtig morge ischs los gange, denn hämer d'stadt agluegt (bilder säged meh würdi säge...), am abig moderat in usgang und am sunntig uf e "chlini" wal-tour vo 8 stund. tatsächlich han ich mini orca wal ENDLICH gseh. leider sinds echli fotischüch die lustige ;-) aber isch würkli super gsi, ihr wüssed ja, die orcas händmi scho immer fasziniert! hihi. aber mir händ würkli lang müesse warte bismers gfunde händ, drum isch d'tour denn au so lang gange. mir händ zwar ganzkörperazüg übercho (git tolli bilder...), aber trotzdem isches denn eifach mit de ziit elend chalt und irgendwie au chli langwiilig worde. drum hämer bi de retour-fahrt so spieli müesse erfinde, wie "wer chan länger uf eim bei stah", etc. so wies glueget händ, simer glaubs di erschte mit dere idee gsi, haha. denn womer zrugg gsi sind, hämer grad na en tipp für es restaurant übercho und so simmer imne super restaurant glandet. irgendwenn das wuchenend hani de sandra verzellt, dass mir immer so viel lüüt säged, ich glich öperem. und im restaurant seit die wo serviert doch tatsächlich zu de sandra, si gsäch us wie d'patricia arquette - und ihre passiert das susch nie :-) am mäntig hämer irgendwie namal d'stadt agluegt, wobi das denn eher chli d'läde gsi sind und husch isch d'ziit wieder ume gsi und mir händ fasch chli müesse pressiere zum de flüger verwütsche. zrugg in edmonton hämer denn au na grad an geburtstag vom whoo-girl müesse, mir sind aso recht beschäftigt da, hehe.

ja guet und denn under de wuche gits halt denn na prüefige und präsentatione, wo eim chli de spass verderbet. di aller-lustigst klass isch mini mäntig-abig-klass. det redtmer eifach irgendwie wild durenand und gaht use und chunt zrugg wämer wet. jetzt hämer scho s'zweit mal e präsentation gha und es wüssed ja all wie ich das absolut liebe. denn chunt mini gruppe-partnerin und seit zuemer si seig so nervös, si weli so wenig wie möglich säge. wie quer isch das denn, ich meine bitzli vorteil hädsi ja doch na mit de sprach :-)) uf jede fall häd denn d'anita halt me gmacht, wil si ja "überhaupt gar nöd" nervös isch. und denn chuntsi na und seit, zum schluss chömer na das video zeige, s'video zeige isch natürli au mini ufgab gsi. naja woni denn vorne gstande bin, merki plötzli, dass die klass so ruig isch wie nie zuvor und konzentriert zuelost. huiiiuuui. mer muess dezue na säge, si liebed da akzent glaubs über alles. und am schluss häd di vorder pakistani/lybier-reihe na afah klatsche - isch vilicht halt nöd so lustig, wämer die nöd vor auge häd, aber ich probier denn mal na es föteli mache:-)

jetzt chunt na de "hot tub"-teil vode story. das isch letscht wuchenend gsi. d'sandra isch vonere klasse-kollegin zunere geburtstagsparty mit motto hawaii iglade gsi. woruf mir euis im 1-dollar-shop mit hawaii-sache sind go usrüste. zuesätzlich hämer na sone lustigi brülle gha vo vancouver. womer det acho sind, hani gmerkt, dass die wo geburtstag häd mit mir im squash-kurs isch! es häd denn chli harzig agfange, sind alles chli schüchi gsi, mit asiatischem ursprung, zum das ganze chli erchläre. irgendeinisch hämer denn beschlosse euisi brülle abzieh, wilmer vilicht chli z'doof usgsehnd. im garte häds en whirlpool (de hot tub) gha und schlussendlich hämer denn nüm andersch chöne als au na go bäderle und denn simmer glaubs grad öpe es stündli dinne bliebe, isch sooo gmüetlich gsi. und denn glichziitig isch das na de russinne-abig gsi, im gsamte händ euis a dem friitig sicher 5 lüüt gfraget, ebmer vo russland sind, mit de ziit hämer nüm chöne vor lache :-)


Und es git wieder mal fotis:

Banff/Canmore

Vancouver

the school

ich han grad na chli vorig ziit, es isch 10 ab 12i ide nacht und ich muess na ca. e stund warte, dass ich eim ide schwiiz chan alüüte für mini bachelorarbet. so ja, das tönt ja scho sehr seriös. aber ich han ja versproche na chli vode schuel z'schriebe. ich han öpe 12 stund schuel ide wuche, tönt nöd grad nach viel, aber es fülltmi so ziemlich us. zuesätzlich muessi ja na einisch ide wuche go schwümme, einisch hani squash-kurs und denn chunt sicher na ein kurs dezue zum bispil "muscle mania", sonen fitness-kurs wo teilwiis ziemli abgaht. denn hänkemer meistens na e aqua-fit stund dra. hüt simmer grad wieder gsi. das isch würkli soooo lustig :-) ide squash-stund hädmi doch de lehrer tatsächlich gfraget, ebi tennis spiele!! hani nöd schlecht gstuunet, daser das usegfunde häd trotz mim bescheidne tennis-niveau. ja genau und denn näbebi gits na normali ufzgi und arbete zum schriebe. wobi ich na mit keinere agfange han - leider. chan aso nani gnau säge, wie schwierig, dasses isch, aber isch sicher nöd lustig. morn müessti theoeretisch 5 siite schriebe, aber han na kei ahnig über was. es wird sich sicher wieder irgendwie regle :-) eifach so daser gsehnd, dasi nöd eifach zum spass da bin ;-) und s'allerschlimmschte sind d'präsentatione uf englisch, da hamer würkli öpis ibrockt. ischmer au scho paar mal passiert, dasmer öpis z'dritte oder so händ müesse bespreche und denn s'resultat händ müesse mitteile und niemmer öpis gseit häd, denn bin ich demfall ade reihe gsi mit mim brochne englisch - schöööön! :-)

vode schuel isch das so das gsi. hüt hämer all internationale studente vo da es thanksgiving-ässe gha. feins kantine-ässe gsi... haha. und mini gang mit spanisch-sprechende lüüt isch wieder um zwei agstiege, en kolumbianer und en mexikaner (chumer langsam richtig dumm vor, wenni bi jedem woni kennelerne säge, "ah det bini au scho gsi", aber isch so), de kolumbianer vo bogota und de mexikaner vo queretaro. soo jetzt chani denn am andere bald alüüte. und debi bini doch soooo müed. da muessi dure.

besos y abrazos

the cave

soooo, ich entschuldige mich für di lang abweseheit und glichziitig widme ich de biitrag minere liebe cousine, milena, wil si mir en "duume hoch" für min blog gschickt häd :-) freuimi immer vo eui z'ghöre! @elvira: danke au dir vielmal für din kommentar. ich muess säge, alles organisiere für das ustuuschsemester häd sich scho jetzt glohnt, minere motivation häds sicherlich guet ta.
mittlerwiile hani glaubs au wieder s'eint oder andere z'verzelle. zum bispil simmer s'wuchenend nach banff uf canmore. das mal isches e fix fertig organisierti tour gsi. dasmal han au ich mir chöne erlaube chli weniger z'schlafe, nachher am morge i aller früeh ufstah und in bus inehocke. wasi leider nöd so beachtet han, isch, dass nöd all büs so luxuriös sind, wie die wo ich mir mängisch in mexico han chöne leiste. das heisst das mitem schlafe isch denn nöd allzu guet gange. allgemein han ich mich am samschtig ufen eher langwiilige tag igstellt und mich eifach uf de sunntig und s'river rafting gfreut. für de samschtig isch caving agseit gsi, das heisst sozäge e höhle-entdeckigstour. s'luschtige häd eigentlich scho agfange, womer euisi overall in empfang gna händ, so hämer euis underenand doch nani gseh, kei ahnig wiemer usgseh händ, wie höhle-arbeiter oder so ;-) i 8-er gruppe ischs denn los gange und agfange häds denn grad mitem erschte abstieg, agseilt natürli wohlverstande. zämegfasst isches eifach überhaupt nöd langwiilig gsi, sondern es chlettere ide höhli und zwüscheddure so eng, daser euis häd müesse aleitig gäh, zersch ufem buch durechracksle und denn ufd siite dreihe, händ füre, ... und so. das war luuuuuustig! am abig in usgang i eine vode einzige schüppe wos det so gha häd. droge sind glaubs nöd ganz unbekannt gsi det a de ufgsperrte auge wo di einte gha händ...
jetzt chunts: am morge isch d'anita doch tatsächlich di erscht gsi vom frauezimmer wo ufgstande isch! (spricht aber glaubs eher gäg di andere als für mich) denn ischs zum river rafting gange und wieder hämer so schöni gwändli döfe alegge :-) isch au ganz lustig gsi, mit total 8 boot glaubs simmer unterwegs gsi. am schluss isch denn e brugg cho und euise bootschef häd gseit, mir chöned drahange, wämer weled. das muessmer mir natürli nöd zweimal säge und scho hani mi ade brugg festghebt und boot weg und 1, 2 sekunde und platsch! und ach isch daaaaaas chalt gsi, hani postwendend müesse um hilfe bettle. vorher hämer natürli glernt, wiemer öper usem wasser zieht: abetünkle, schwung hohle und scho bini wieder im boot gsi, zum glück für mis herzli!
denn e churzi stärchig und es isch wieder heizue gange nacheme wuchenend, wie für mich zuegschnitte :-) bi de heifahrt ischsmer denn plötzli irgendwie langwiilig worde. hani eigentlich nur churz zu de östricher wele go schwätze, aber irgendwie häds denn plötzli sone ganz lustigi unterhaltig mit allne rundume gäh, die isch vo füess, zu polterabig, zu dütschem und schwiizer ässe bis zu mini-säuli gange. und am schluss häti eigentlich fasch na lieber chli wele wiiter bus fahre, sich so lustig gsi. ou und am abig na uswärts go ässe, dasi denn ämel am mäntig morge sicher ganz kaputt gsi bin... ja genau, de nächscht biitrag wird denn über d'schuel si. das isch nämli au de grund, wieso ich jetzt so lang nöd gschriebe han. sind ja doch es paar rückmeldige cho, ich sel d'schuel nöd vergässe. das heisst ihr sind sicher total gspannt uf de bricht ;-) neinei, das isch denn schnell verzellt. und denn muessi up-to-date si, wil vom nächschte wuchenend gits au scho wieder öpis z'verzelle - vancouver isch agseit, am mäntig isch s'kanadische thanksgiving, mir händ schuelfrei und müend das drum grad usnütze. hoffentlich hoffentlich chan ich denn au endlich mini orca- bzw. schwertwal go aluege! und mir sind euis na e taktik am überlegge, wie mir zunere thanksgiving-iladig in vancouver chömed. momentani idee isch: mir sind zwei schwiizer-meitli, wiit weg vo familie und fründe. grad jetzt bi thanksgiving (womer ja bi euis au immer so fesch fiired) simmer da so einsam und chönted chli ablenkig bruche.

internationals on the road oder teambildung für fortgeschrittene

letscht wuchenend isch au na spannend gsi, mir sind z'13. uf banff. 3 autos hämer gfüllt, kriterie fürd fahrer: ab 25i, wil denn s'auto miete günstiger isch. ok, denn hani scho mal mini ufgab gha. dur das bini irgendwie denn au plötzli so chli is erwiiterte ok inegrutscht, d.h. so abfahrtsziit und so bestimme. d'frag isch scho mal gsi, was sägemer de südamerikanerinne für e ziit?! mir händ euis denn entschlosse di richtig, aber mit ere chline bemerkig: wär kuul, wenn all pünktlich wäred. schlussendlich sind denn doch tatsächlich all det gsi am morge am 5i, häted sogar na fasch mir wele säge, ich seig z'spaht :-) naja, de holländer häd e chli verspötig gha, sind mitbewohner häd ebe am abig vorher party gmacht im zimmer. bald simmer denn all gsi und es häd chöne losgah. de vorderst häd es gps gha und d'sandra und ich nöd. uf jede fall glaubs vor usgang edmonton hämer scho d'sandra verlore, wils ziemli schwierig isch 3 auto hinderenand her fahre und wil de vorderst eifach stress gha häd. simmer denn ämel froh gsi wo all det gsi sind und mir euis gfunde händ. wil di kanadische natel, womer hauptsächlich d'nr. ustuuscht händ, sind usserhalb vo edmonton nüm gange. mir händ natürli all eifach s'billigste kauft :-)
d'stimmig isch au chli agschlage gsi, wil jede so sini vorstellige gha häd und mir irgendwie uf en gmeinsame nenner händ müesse cho. denn hämer beschlosse mal en kaffi go trinke und bespreche. ufem weg sind plötzli scho mal die vo ecuador und die vo brasilie verschwunde. ich han es riiiieeese deja-vu gha, woni det mal fascht di eint vo mexico in luzern verlore han, wil si eifach ihrere shopping-nase na isch. ich han denn so näbebi erwähnt, dass si sicher am shoppe isch und de eint vo östrich: "nei, eh nöd, machmi nöd fertig..." denn binis go sueche und si häd scho ihres erschte souvenir müesse chaufe, hihi :-)
jaja und vo det a ischs eigentlich besser gange, mir händ denn es programm gfunde, wo all irgendwie iverstande gsi sind. am sa go wasserfäll aluege und nachher na zu de hot springs - aso eigentli es thermalbad. denn usgang und am sunntig zum moraine lake und lake louise. ich glaub de samschtig abig isch denn eine vo de beschte abig worde, woni da scho erlebt han und das obwohli zersch würkli kaputt und so wiiter gsi bin. isch scho nöd immer liecht mit somene hufe ;-) di eint jammeret di ganz ziit, di ander mag kei 10 meter laufe, anderi sind egozentrisch veralagt... ahahah. d'autofahrt isch au ganz witzig gsi, ich han zum glück s'kommunikativste auto verwüscht bzw. d'insasse. bin immer unterhalte worde und so sind die total 10h easy dure.
nächscht wuchenend gahts anen river rafting trip uf canmore. bini au gspannt. die wuche händ d'sandra und ich na zwei iladige zum ässe. morn gits chilaquiles und am friitig spaghetti, hehe, es wird euis glueget :-)
so und jetzt döfi na e präsentation vorbereite. tiptop, öpis gäg mini präsentations-angscht unternäh, für fortgschrittni au das - uf englisch. aber immerhin sind di andere bis jetzt nöd so mega guet gsi im vorträge. de ungliebti satz: "das war meine präsentation" zum ufhöre, chamer au uf englisch säge, hihi, und das händs glaub nani gha da ide schuel, dasses evtl. nöd so optimal isch :-)

cu

the fire practice

uuuuuiii ui, ich muess wieder emal es update mache, wieder es paar gschichtli zum verzelle und es staht na me bevor. eigentlich hani eui ja mal miteme schuelbiitrag wele langwiilig, wil doch di eint oder ander reklamation cho isch, ich heigis so easy da. es würd würkli viel ztue gäh. langwiilig wirdsmer nöd. han au so gruppearbete und so zum mache. aber das muess irgendwie näbebi gah. und ich han ja nöd mal en fernseh da, aber bruchen ja eh nöd, gell vivi :-)
ah ja und jetzt chömemer zum titel. letscht donschtig morge isch das glaubs gsi, wenni mi richtig mag erinnere. zersch na e churzi vorgschicht: am mittwuch abig simer is hudsons eis go trinke. de erscht wii isch mega günstig gsi, denn hämer beschlosse grad namal eine nä. nur dumm, si händ en fehler gmacht uf de abrechnig - es glas statt e fläsche verrechnet - aso de zweit isch denn tüür gsi. uf jede fall, häd denn de mexikaner gseit, er tüegi mir alüüte, dass ich mag ufstah. denn am donschtig morge wachi dur en elend luute alarm uf, gstande im bett bini. use id chuchi grennt, und denkt, ich heig vilicht d'herdplatte vergässe abstelle. d'füüralarm da sind bekannt, die sind scho ab und zue bim choche losgange - usser bi de swiss twins ;-) uf jede fall isch alles i.o. gsi mit de chochplatte und denn hani gmerkt, dasses überall alarmet und gmerkt, dass das jetzt die akündiget füür-alarm-üebig isch, hahahahahahha, am morge am 6i. denn hani eifach möglichst viel chleider agleit und bin useglaufe, kei ahnig gha wasi han müesse mache. ich bin ja gott sei dank im 1. stock, aber denn dusse hämer müesse warte bis all 13 stöck vo dere residenz evakuiert gsi sind. han eigentlich wele es föteli mache, aber hans denn us morgemuffeligkeit irgendwie vergässe... ja denn hani am mexikaner chöne schriebe, es seig susch grad guet, ich seig jetzt wach :-))
ah ja und denn hani na e story wo d'nicole vilicht lustig findt. de eint hädmer geld gschuldet und gseit, er bringtmers am morge vor ich schuel han verbi. schlussendlich hädermi gweckt und nur dank ihm hani nöd scho s'erscht mal verschlafe. aber de ruef hani jetzt natürli au da...

Erste Fotos

danke vielmal für eui nachrichte! @piratin im geiste: haha, ich hoffe, du bisch nüm gschädiget vom wandere und falls ja, denn muessi evtl. chli rücksicht näh uf mini arme mitstudentinne da :-) wartemer de winter ab, ebi als eskimo-girl tauge oder nöd, chch. @mamita: hmmm, ja das isch total dini pflicht und sit ich din kommentar gläse han, häds kei party me gäh. nei würkli, isch susch mängisch fasch unmöglich uf das zügs uf englisch läse, wämer so todmüed isch. @nadine: ooooh danke vielmal, ja bini scho am überlegge, was füres spiel ich denn sel go luege, das isch e gueti idee. oktoberfest isch super, traditione müend ufrecht erhalte bliebe... :-)

sooo und da gits föteli, mini kamera taugt leider nüm so guet. di schöne föteli sind vo de sandra oder em daniel from switzerland.

Edmonton

Let's go Eskimos oder das echte Woo-Girl

sali sali, es churzes gschichtli hani z'verzelle. ich denke, de ziitpunkt isch au ziemli optimal, wil ja bi eui bald mäntig morge isch. und obwohls grad momentan chli entfernt isch, magi mi doch na erinnere, wie härt de mäntig morge isch. ich han zwar morn au na verglichswiis en härte tag, aber alles total verchraftbar.
aso am friitig häd eini ide spanisch-klass verzellt si göch an football match - es nütztmer aso scho öpis det hi z'gah! und uf das abe han ich grad d'organisation für euis internationale students a mich grisse zum an match gah. mer muess dezue säge, es erforderet organisatorischi höchstleistige da bi dere gruppe ;-) nei nei, mittlerwiile ischs eifacher, aber trotzdem bismer denn det gsi sind. uf jede fall bini grad riesig euphorisch worde womer det gsi sind. das stadion häd platz für 63 000 lüüt. ca. 45 500 sind gsi. denn chunt s'eröffnigsspektakel mit fürwerch, cheerleader, etc. ja und wos agfange häd, isch euis denn in sinn cho, dasmer d'regle eigentlich gar nöd kenned, hihi. ich han aber de beschti platz gha und grad de mitem gröschte know-how näb mir chöne frage. di wichtigste regle nach ihm: de ball muess irgendwie mind. 2 linie vorwärts cho, susch chunt di ander mannschaft de ball über und di zweiti regle isch: wenns fürd gegner-mannschaft e wichtigi bzw. schwierigi situation git, wird lärm gmacht, dasses de stört wo de ball muess schüsse. gesagt getan, hehe :-) ja und de rescht hämer eifach mit siiteblick gschafft, aso klatschet wenn d'mehrheit au klatschet und so. irgendeinisch hani denn doch na gmerkt, dass genau min sitznachber für calgary isch und nöd für edmonton, chch. im dritte viertel häder denn mal nagfraget, eb jetzt alles klar seig und denn isches de startschuss gsi zunere frage-/antwort-rundi :-) edmonton häd denn verlore, aber es isch echt lustig gsi (zumindest für en teil vo euisere 11-chöpfige truppe - häd sogar rabatt gäh :-)). ah ja eskimos, so heisst d'mannschaft vo edmonton. die spieler tüeged näbebi na schaffe, die verdiened anschienend nöd allzu guet....
und jetzt na zum woo-girl: all die wo meined ich seig eis (dario & valentin), ihr müessted mal di eint vo ecuador gseh wo da isch. heieieiieiii. zmitzt im zug chasi d'hand lüpfe und usem nichts use "wooooooooooooooo" rüefe :-)) ja, ich verwechsle mängisch chli d'abig, aber ich glaube nachher ischs wiiter gange i mim zimmer bzw. i minere wohnig. ich han jetzt glaubs definitiv kei mitbewohnerin, s'schildli vode "erin" hanget nüm ade tüür. d.h. wämer nöd ganz so guet chan nei säge, wird das extrem gföhrlich und git wenig schlaf, wil sobald es zimmer gsuecht wird, womer chan higah, wird mis zimmer erwähnt. denn chömed all da hi, wenns nett sind nämeds na ztrinke mit und uf gwüssi muessmer äs aug ha, wils eifach chömed go schmarotze!! de mit de erin häd natürli scho zu ziemli vielne witz gfüehrt über gspaltni persönlichkeit, dasi denn s'zimmer wechsle, je nachdem ebi erin oder anita bin und so :-)
de usflug gester isch au na lustig gsi, mir händ wele go golfe. d'sandra und ich sind denn mal s'woo-girl us ecuador im zimmer go abhole, e zweiti us ecuador isch det gsi - ziit: 12.30. denn ischsi grad na am skype gsi mit ihrem fründ, all händ müesse hoi säge, denn häder na de hund und di ganz wohnig müesse über d'kamera zeige, si häd sich na müesse umzieh, di zweit ecuadorianerin häd na i ihres zimmer müesse go ihri sache hole. denn häds plötzli gheisse es chömed na en mexicaner und namal eine vo ecuador mit. womer mal us de residenz gsi sind, häd d'maria jose gmerkt, dass si kei sunnebrülle häd, denn wo si zrugg cho isch häd de ander typ au na e sunnebrülle wele. und und und. haha und denn isch d'frag cho mit welem bus dasmer gönd und mir händ denn leider müesse antworte, dasmer laufed. am 4i simmer bim golfplatz gsi. aber mir händ ja zum glück kei stress gha... ja und denn hämer euisi golf-lehrer grad debi gha - nur immer di richtige lüüt s'richtige frage, das hämer fängs richtig im griff! am abig ischs is beschte restaurant vo edmonton gange: lachs anere maple-marinade mit härdöpfelstock-früehligsrolle und gmües :-) nachher s'erscht mal so s'richtige nacht-läbe vo da. und hüt jetzt is gröschte shopping-center da, das isch ehemals mal s'gröschte uf de welt gsi, jetzt natürli zwüscheziitlich vo dubai abglöst. det inne häds en wasserpark, es iisfeld, vergnüegigspark, etc. mir händ nöd emal de 1. stock gschafft, sind aber ca. vo 12 bis am 5i det inne gsi.
weles schwösterli häd eigentlich kommentiert? am smile a d'nadine? naja, de travis, de isch glaubs öpe 20. aber bisch natürli nöd di einzig wo das meint. aber ich chan d'spekulatione au na chli atriebe und säge, dasses da au na ustuuschstudente vo mexico, ecuador, östriich, dütschland, holland und nöd z'vergässe china ("tschainaaaaaaaa") häd. wobi die händ di meischte chli angscht vor mir. hehe, spass bei seite. guete start id wuche!

the story of the bison

ja genau, aso am weekend hämer ja wele uf jasper oder banff. leider sind all hotels, hostels, etc. usbuechet gsi, wils es verlängerets wuchenend gsi isch (mäntig isch labour day gsi...). denn hämer (sandra und ich) halt am sunntig und mäntig es auto gmietet zum d'gegend vo edmonton chli unsicher zmache. am sunntig ischs in elk island nationalparc gange. das isch e gegend mit verschiedne chline see, mega schön. mer chan ca. 10 verschiedeni wanderige mache. mir händ euis für e 13km wanderig entschiede womer bison chan gseh. de ganz weg hämer chli über die bison gredet und spure gsuecht und so. amene sichere plätzli churz vor endi vo de wanderig hämer denn chöne zmittag ässe, vorher ischs euis chli zunsicher gsi, wils eifach nur de weg und nachher büsch oder wald gha häd. mir sind denn so devo usgange dasmer jetzt keine me werded gseh, doch churz vor endi isch so eine ufem weg uftaucht. isch denn e chli doof gloffe, wil de 1. RIESE gross gsi isch und 2. genau ufem weg uf euis zuecho isch. mir händs denn plötzli chli mit de angscht ztue übercho. vor allem wilmer kei awiesige übercho händ wiemer euis seled verhalte usser dasmer en nöd seled berüehre (danke, wiemer lust gha häted sonen riese bull z'berüehre...). zersch simmer retour gloffe, aber mir händ ja nöd grad lust gha me als 10km namal zlaufe uf di ander siite, aso hämer euis denn einisch entschiede chli vom weg weggah und ihn denn so durelah. er häd euis denn so agluegt und isch verbigloffe, aber churz bevormer wieder uf de weg händ wele gah, häder eifach wieder umkehrt und mir händ gmeint, er chöm genau zu euis. hahah, s'herzli isch chli strapaziert worde. womer denn die situation gmeisteret händ, simmer denn froh gsi dases bald fertig isch und mir kein bison me gsehnd :-) und de mitem bäre go aluege überleggemer euis vilicht doch namal. de banff nationalparc staht jetzt neu am wuchenend inere wuche ufem programm und zwar z'14. das wird es rechts unterfange das z'organisiere...! aber wird defür au lustig mit allne internationale studente (vo ecuador, östrich, holland, frankriich, mexico, schwiiz, ...)

oooh ja und am abig hani en pingpong-match gäg de holländer gunnä, chch. wobi mittlerwiile stahts scho 1:1...:-(

am letschte mäntig, labour day, simmer denn d'gegend südlich vo edmonton go erforsche. das isch nüm ganz so spannend gsi wie de oste, wil im oste häds all paar kilometer wieder sonen schöne see. de daniel from switzerland isch au debi gsi, haha, de arm häd jetzt vo euis de übername übercho und wirden nüme los. er isch ebe überall so bekannt, immer wennd mit öperem redsch und seisch chämsch vo de schwiiz, frageds di ebd de daniel kennsch! hihi. naja defür heissed d'sandra und ich jetzt swiss twins, isch au nöd schlecht :-) uf jede fall schlussendlich hämer sones mais-labyrinth gfunde mit suschtigem vergnüegigspark. s'allerbeschte dra isch sones luftküssi, wo eigentlich es trampolin isch. das häd soooooo spass gmacht!! zersch sind nur chind und mir gsi, aber plötzli händ denn na anderi erwachsni de spass dragfunde. git denn au dadezue föteli. ja susch häds ebe na das labyrinth gha, woni nie me usegfunde häti, wäri elei gsi :-) denn es säuli-renne, es gmües-schüsse mitere schlüderi oder so ufen alte bus und eifach na en spielplatz. und überall häds picknick-plätz da. voll gmüetlich.

am abig simer go s'auto abgäh und uswärts go ässe imene mega feine restaurant: lachs anere maple-sirup-sauce mit sozäge früehligsrolle gfüllt mit härdöpfelstock und feins gmües :-) de plan wär natürli gsi nachher is bett zgah, mir sind ca. am 10i zrugg zu de residenz cho und am zischtig isch de erscht schueltag gsi. ja und denn hämer d'östricher troffe ide lobby vo de residenz, mir seled au na cho. im hudsons (sozäge s'roadhouse vo edmonton, näch vode residenz) isch e back-to-school-bash agseit gsi. us integrationsgründ hämer denn zuegseit eis bierli go trinke. sind denn zwei oder so worde. am 12i so wils s'erscht mal schuel gsi isch nächscht tag wele heigah, isch würkli alles eigentlich guet gloffe. und denn chunt wieder de eint östricher und findt mir müessed na en schlummi nä. ich han ja kei mitbewohnerin bis jetzt und denn isch natürli mis zimmer usgsuecht worde für de schlummi. zerscht z'viert und alles nach wie vor i.o. aber denn sind nachher die wo na im hudsons gsi sind au cho und irgendeinisch di erschte wieder gange, etc. naja und di letschte am 5i. wieder mal so typisch ich, genau denn wenns nöd plant isch...

ja das wärs eigentlich so chli. s'spanisch isch hüt chli spannender gsi und jetzt stahni voreme dilemma. kei ahnig wieni mi sel entscheide, vor allem wäg dem travis (wo ide schwiiz gsi isch), de chönti euis evtl. na zu spannende ort bringe :-)

abrazos,
anita


p.s. a spanisch-lern-möglichkeite fehlts au nöd, ich han da scho sone richtigi gang mit spanisch-sprechende, aber mittlerwiile schaffemers englisch z'rede...

the real student life ;-)

heeeeeey mini liebe,

zersch mal danke vielmal fürd kommentär. freuimi immer mega vo eui z'läse, au wenni mängisch nöd grad so schnell zruggschriebe... @vivi: de letscht abig ide schwiiz häd sich natürli seeeeeeeehr glohnt. @elvira: zum glück häd sich das jetzt postwendend gänderet und d'kanadier zeiged sich vode beschte siite.

sooo, was seli so verzelle? isch viel gloffe ide zwüscheziit. vilicht zersch mal zu dere wuche: gester hani min erschte schueltag gha. topvorbereitet nach einere stund schlaf bin ich denn id stund "asia pacific political system" ingehocket und natürli würkli beinahe igschlafe. s'zweite fach isch denn na spanisch gsi, das hani jetzt doch na gna. s'niveau isch leider viel ztüüf und ich glaube es git kein höchere kurs me. mir händ glaubs bis mitti nächscht wuche ziit zum euis entscheide. aso wenni s'spanisch striche denn hani denn würkli en easy stundeplan :-) aber evtl. isch das au guet, wil 1. gits denn na so arbete zum schriebe und viel zum läse (uf englisch natürli) und 2. gaht glaubs d'ziit in kanada na schnelle verbi als ide schwiiz. weiss nöd gnau a was dases liit, vilicht ade grosse lebensmittel-läde da (d'entscheidige chönd bi mir mängisch ja es ziitli gah und d'uswahl isch RIESIG) oder evtl. au wild eifach mit allne chli afahsch rede, brucht natürli au chli sini ziit ;-)

aso uf jede fall det im spanisch, hämer euis z'zweite müesse zämesetze und chli über sich verzelle. nachher hädmer denn di ander person de ganze klass müesse vorstelle. wo mis gspänli mich vorgstellt häd, hädsi gseit, dasi us de schwiiz bin. denn häd eine so gfraget vo wo genau, und ich han na denkt, hä wieso wet de das so gnau wüsse. nach de stund simmer beid ufenand zuegstüred und denn häder verzellt, er seig es jahr in zug gsi, glaubs so gymi-ustuschjahr oder so. plötzli wechslet er uf schwiizerdütsch und denn würkli eifach fasch perfekt, eifach en liechte kanada-akzent. woooooaaaa han ich glueget, und das nach eim jahr schwiiz!! er häd schier luftsprüng gmacht so freuid häder gha. drum muessi jetzt morn sowieso namal id stund gha zum nummere mit ihm ustuusche und chli connections mache. mir händ festgstellt es auto z'ha isch na recht wertvoll da. s'lustige dra isch, dasmer da scho e mega "schwiizer gang" händ. zwei au vo de hochschuel luzern woni vorher nani kennt han. d'sandra häd scho im flug da ane e schwiizerin kenneglernt, wo ihri cousine da chunt go bsueche. die isch irgendwie 1994 oder so dahizoge mit ihrne eltere. die reded natürli au schwiizerdütsch. aso s'positive dra: ich wirde sicher schwiizerdütsch nöd verlerne, s'negative: evtl. bitz weniger englisch lerne, hihi, aber gibmer alli müeh :-) ah ja, und zum die schwiizer gschicht na abrunde: eine wo letscht jahr im ustusch gsi isch, isch da uf bsuech. de treffemer jetzt hüt wieder zum poulet flügeli ässe. er isch wie gseit letscht jahr da gsi und häd sich verliebt da. zwei randbemerkige: 1. tued natürli witers material liefere für alli wo denked, ich verlieb mich da :-)
2. @vivi: mis beliebte "jöööh" chamer uf "sweet" umändere, aso au die jööö-zwüsche-rüef wirdi nöd verlerne ;-)

soo jetzt bini chli vom thema abgwiche. am namittag hani denn na change management gha. scho müesse i gruppe iteile. mini gruppe schiint na recht guet z'si. huuui glück gha, grad näb di richtig aneghockt. da vilicht na e chlini randbemerkig ad martina: ich hamer din rat zu herze gna und immer guet überleit wo hi z'sitze, de afang isch wichtig ;-) ja genau, und denn hüt hani en bsunders härte tag: 1h "intercultural and diversity communication" vo zwei bis drü. am morge hani s'schwümmbad unsicher gmacht nach öpe 10h schlaf. s'schwümmbad isch kuul, es häd soooo wenig lüüt. d'europäer sind mit abstand di sportbegeisterete bzw. gsundheitsbewusstischste lüüt ufde welt, das fallt wieder emal uf. i dere stund am namittag hani chli konzentrationsschwierigkeite gha, wili de eint di ganz ziit han müesse aluege ;-)

ja ihr gsehnd, mir gahts guet. ich hoffe, eui au allne. jetzt chunt na d'büffel-story :-)

Hello again ;-)

Sooooo, langi Ziit ischs her, aber jetzt isch min Blog wieder für es paar Mönet aktiviert... :-)

Edmonton isch de neui "place to be". Natürlich wie sich das ghört bi mir, faht d'Gschicht scho bim Flug a... Verspötig ab Züri, isch ja na ok. Denn erschti Passkontrolle in Amsterdam, um de ganz Flughafe umelaufe mit zwei Täsche Handgepäck, nimmt mer au in Chauf. Flug nach Vancouver und irgendwie di ganz Ziit z'ässe übercho, hihi. Aso ja und denn in Vancouver die selbe Story wie damals in Mexico City: Passkontrolle und Immigration, zersch Passkontrolle riese Schlange...
-
chline Ischub für all die wo sich mit mir scho über Fische unterhalte händ, hihi: immerhin hani es paar Holländer troffe zur Unterhaltig, Unterhaltig isch fasch na untertriebe :-) Und was macheds natürli in Kanada: go fische! Hani grad wieder emal minere Frag chöne nagah, wieso so viel Männer gern fisched. Leider hani kei Antwort becho wil de einti di ganz Ziit über sin Grizzly-Bär verzellt häd, woner wet gseh - au spannend! ;-)
-
denn Abschied vode Holländer, ooooh, und zum Immigrationsbüro. Erschti schwierigie Entscheidig, vorem Astah s'Gepäck hole und dusse stah lah (mer döfs nöd inenäh!) oder eifach silah. Ich hami fürs silah entschiede. Gfühlti 2h stund astah, kei ahnig me wie viel dases gsi isch, aber uf jede Fall isch denn langsam d'Boarding Ziit vom Wiiterflug nächher cho. Hani en zweite Typ gfraget, ebmer da wämer im Transit isch au di ganzi Reihe muess astah. Denn häder gseit ja und ich werdi wahrschinli min Aschluss verpasse - DANKE VIELMAL! Irgend einisch isch sonen witzige Polizist cho go Päss isammle, denn bini ohni Pass det gstande, haha. Und denn häder denn nach langem langem warte de Fötzel bracht, woni brucht han. Denn hani natürli na de Koffer müesse go sueche, Gepäckusgab isch scho LÄNGSTENS fertig gsi. Jaja und denn Flug umbueche, häd denn ne en zuesätzliche Stopp in Kelowna gäh. Aber vo dem Flug hani nüt me gmerkt, bin nur ineghockt und d'Auge sind zuegheit. Wie au denn vode Taxifahrt vom Flughafe in Edmonton zu de Schuelresidenz - nüt mit übercho, es isch nüm gange zum wach bliebe, min letschte Abig ide Schwiiz isch halt echli sehr zlang gsi :-))

Schlussendlich aber guet acho und grad es Föteli döfe mache für mini ID da fürd Wohnige, isch USSERORDENTLICH GUET worde natürli, ich muesses denn fötele, das isch de hammer :-)
Ja und jetzt git de Akku de Geist uf, schade...