d'sandra häd chli pech gha mitem flug vo edmonton uf honolulu. ich hansi denn in vancouver sozäge überholt und mir händ es lustigs foti gmacht. si häd denn d'nacht in los angeles verbracht und ich in honolulu. det hani au s'höchschtmass a penner je i mim lebe gseh. und vor allem sinds all scho super früeh is "bett" so dassi denn zwüsched ihne dure min weg han müesse bahne woni öpis bin go znacht ässe - krass!
ok und jetzt da ufde oahu-insle simmer chli mit euisem mietauto am umecruise. wasmer super im griff händ, isch di guete restaurant finde - richtigi perle hämer gfunde bis jetzt! mitem wetter hämers chli weniger im griff. gester simmer zum sandy beach gange zum bispil, händ euisi siebe sache uspackt, sind aneglege, afange läse und scho häds afah regne! woruf mer wieder alles händ chöne zämepacke und es nächschts örtli sueche... da hämer jetzt na e nacht verlängeret und jetzt wär de plan go schildchrötli schnorchle :-)
morn würdemer uf maui flüge, zwei nächt in lahaina pfuuse, en tagesusflug ufd molokai-insle und denn die letschte 5 nächt in kihei. au det hämer natürli wieder es mietauto, nur scho wägem schöne nummereschild wos da händ :-)
wasmer immer wieder chli vergässed isch, dass ja wiehnachtsziit isch. aber si gäbed sich immer ganz müeh, dasmer dradenked, d'wiehnachtsdeko isch teilwiis recht gigantisch und laht euis bzw. euises auto immer wieder zmitzt ufde strass ahalte, dasmer chönd es föteli schüsse :-)
ah ganz rekordverdächtig isch au, dasmer chum simmer acho im hostel scho di erscht iladig gha händ zum mit es paarne anes lagerfüürli am strand chli go höckle. de sternehimmel isch doch es rechts prachtswerch da. und dass hawaii en regeboge ufde auto-nummereschilder häd chunt au nöd vo irgendwo. ich glaub mir händ ufghört zelä wie viel regeböge mir scho gseh händ.
und jetzt wünschi allne ganz schöni wiehnachte - mit herzlichem dank a mini "video-produzentin d'sandra" - chani da wieder es video zur verfüegig stelle, di wiitere mittänzer dasmal sind de (one and only) buffalo bill, de hund vom hunderestaurant in edmonton und denn na euisi "lieblingsmaske" vo halloween. glichziitig wär das wahrschinli au min letschte post gsi vo dere reis, truurig aber wahr usser es passiert na öpsi gaaaanz spannends... ;-) ich denke aber de blog wird bald wieder aktiviert, hani ja doch jetzt wieder ganz viel möglichkeite und ideä für witeri reise - fernweh wird nöd besser mit reise, mer chunt nur immer meh ufde gschmack :-)) keis wunder bi dene schöne landschafte!!
2 Kommentare:
Huhuuu anita! So zum abschluss hinterlah ich wieder emal en kommentar, dini posts sind spannend, wie immer :-) ! Han ja mittlerwiile au es laptop und s folge vode posts und s kommentiere isch wieder mögli!! Juhuuu! :-)
Wau, tolli fotos (wil aso echt au bald mal uf hawaii!!) und da verstaht mer au, dass s reisefieber je längers je meh gweckt wird! Abr s wird ziit, dassd wieder emal hei chunsch, susch gwöhni mi no vollends dra, dassi alleige wohne! Hani scho verzellt, dass dis zimmer scho umfunktioniert worde isch?? Hehe, ich nutzes fliessig und mueses leider (haha) bald ruume.. Neinei, das machi ja gern! En schöni restlichi reis no! Gnüsseds!!! :-)
Huhuuuuuu fifi!:-) Hihihihi, und di letschte gschichte hamer für wenni zrugg bin ufgspart. hamer nämli scho fasch überleit, ebi namal chli sel schriebe - aber lohnt sich ja fasch nüme... bis baaaaaaald. freuimi!
Kommentar veröffentlichen