Scho wieder Abschied...:-(

... Bin ide zwuescheziit wieder in tulum acho... Und mues mi scho wieder verabschiede, vom paradies! Und grad vorher hani de letscht blick ufs meer gnosse. Leider isch huet de ganz tag bewoelkt gsi, aber s'meer isch trotzdem tuerkis gsi, mega schoen.

Nach puerto escondido bini witer suedwaerts bis uf guatemala gange. Mini erscht begegnig mit guatemala hani noed grad super gfunde. Alli vom bus haend muesse usstiege und zfuess durd grenzkontrolle duregah, das isch da so ueblich, hani aber noed gwuesst. Uf jede fall choemed all uf dich zue und saeged, si schaffed da, aber schlussendlich haesch kei ahnig, wasd muesch mache und wemd chasch glaube. Und so vil luet, wo uf dich ireded hani na nie erlebt und bin ja jetzt scho a verschiedne ort gsi. Und natuerli all bi mir, di andere vom bus sind di meischte vo de gegend gsi und mir haendses natuerli wiedermal grad agseh, dasi touristin bin. Mini auge muend recht verraeterisch si. Haends mittlerwiele au scho als amarillo = gael bezeichnet :-) Was fuer euis ja ganz normals brun isch...

Aber nach dem hani nur positivi erfahrige in guatemala gmacht. Han ja bitz bedenke gha, wasi ghoert han. D'jessica und de mario (woni vor 2 jahr in kolumbie kenne glernt han) sind mi go abhole und ich han di ganz wuche bi ine im gaeschtezimmer choene si, hami richtig wohl gfuehlt wiedermal es chlises dihei ha. Und agfange haeds denn grad mit em hochsig. Zerscht simmer bi de kollegin vo de jessica go chleider aprobiere und han denn schlussendlich oepis passends gfunde. D'hochsig isch de hammer gsi. Han na nie so vil bsoffni gseh amene hochsig, di einte haend am naechste tag nuet me vode nacht gwuesst... Es haed e mega grossi band gha wo gspielt haed, choentsch i de schwiiz nie zahle so oepis. Ide erschte nacht bini uf jede fall scho mega spaht (oder frueh) is bett. Und so ischs denn eigentli au witer gange. Si haend mega vil mit mir unternah.

Vo guatemala city bini denn wieter uf tikal und bin froh, dasi dethi au na bin, isch so idruecklich gsi! Nach tikal ischs wieter gange uf belize, ade grenze namal dasselbe mit usstiege... In belize hani sogar na es visum muesse "chaufe" (50 Fr!). In belize denn direkt ufd insle caye caulker mitem wassertaxi. Bin zerscht chli enttuescht gsi, wils noed so paradiesisch gsi isch, wienis mir vorgstellt han, aber han denn gli gmerkt, wieso dases trotzdem vilne gfallt det. Isch e mega spezielli stimmig, chamer gar noed guet beschriebe, eifach lustig! Denn bini witer uf san pedro, e anderi insle, wil vo det haeds es wassertaxi 2h bis zu de grenze vo mexico, alles de kueste na... Und denn schlussendlich bini jetzt wieder i mim tulum glandet :-)

Huet ide nacht gahts uf villahermosa mitem bus, mitem ziel ide naechste nacht uf oaxaca, das fehltmer na. Nach oaxaca blibedmer na 2 oder 3 taeg in mexico city und denn gahts scho hei.

Drum denki, das isch min letschte itrag vo mexico us, gli gsehndermi denn wieder ide schwiiz, ade em oder wo au immer!

Also, bis bald!
Anita


Da na d'fotis dezue:

Caye Caulker, Belize

Tikal

Panajachel

Antigua

Guatemala City

Puerto Escondido

Hoi zaeme

D'news vo mir... Hami schlussendlich entschiede zum chli da in puerto escondido bliebe. Han cooli luet kenne glernt und d'stimmig isch mega agnehm da. Morn ischs scho e wuche woni da bin. Mir haend einiges gmacht i dere wuche, aber bin au vil umeghaengt. Drum isch morn glaubs ziit zum witer z'gah. Usserdem hani mini akunft in guatemala uf de samschtig verschobe und set denn au wuerkli det si. Weiss ja noed wasi na alles atriff bis uf guatemala. Am samschtig isch grad na es hochsig in guatemala und si haendmi iglade au z'gah. Mal luege, mues nur na irgendwo oepis uftriebe zum azieh.

Han chli probiert surfe, aber es isch mega schwierig. Han eigentlich me glernt paddle und mit de welle und em surfbrett umgah. Aber huet isch jetzt grad guet gsi zum ufhoere. Han schoen choene mit de welle mitriete, eifach noed richtig ufstah, aber das ischmer denn egal gsi. Sind rechti welle da, han natuerli amene ort glernt wos chliner sind, aber fuer mich sinds glich na gross.

Also da gits wieder di neuschte fotis und denn denki meldi mi wieder us guatemala, wenni ziit han. Han glaubs es recht grosses programm.

Bis gli
Anita (Hami mittlerwile au a Ana gwoehnt)

Puerto Escondido

Pazifik

So, ich meld mich vom pazifik. Han mittlerwile scho es paar ort kenneglernt da, unter anderem wiedermal es paradies: MARUATA.

Und jetzt grad bini sehr positiv ueberrascht worde vo puerto escondido. Es isch vil weniger touristisch als ich befuerchtet han. Eifach es surfer-oertli und daher mega friedlich. Was mir jetzt aber chli d'plaen durenandwirft. Han alles schoen planet gha, wili mi zum teil han muesse akuende, weni chum. Zum bispil in guatemala, wili es paaerli wet go bsueche, woni mitem pablo vor 2 jahr in kolumbie kenneglernt han. Aber ich glaube, es git e chlini planaenderig und ich nimm da na paar taeg stunde zum lerne surfe. Di gross frag isch jetzt eifach, was wird gstriche oder kuerzt? Das muesmer jetzt am strand go ueberlegge... Hoffe, das stoert eui noed ;-)

Also das waers mal, halt wieder «ohne grosse worte», aber d'bilder sind eh s'coolste.

Hasta luego
Anita

Barra de Navidad

Maruata

Zihuatanejo

Acapulco

Medellín, te quiero

Hooolaa

Ich bin wieder in mexico acho und han inzwuesche au mis "nach-kolumbie-tuef" ueberstande. Isch au noed so schwierig, bin jetzt bi de pazifik-straend aglangt :-) Aber han es foti ufeglade zum mini stimmig im flugzueg z'zeige.

Was vilicht noed di bescht idee gsi isch, isch de letscht abig na in usgang gah. Da mir eh am morge am 4i haend muesse losfahre, bini natuerli nuem go schlafe. Und bim flughafe ischs denn los gange: Zerscht haends allne s'gepaeck uftah und kontrolliert. Hani natuerli elend lang muesse astah, bi fascht duretreit. Aber denn noed gnueg, denn haendsmi na usenandgnah waegem geld. Haendmer noed glaubt, dasi nur 20 000 Peso (ca. 10 Franke) debi han und haendmi voll usglacht. Ich hans gar noed lustig gfunde, wili han wele go schlafe. Die womi chli besser kaenned wuessed, was das heisst. Han denn eifach g'antwortet, es gaeb vilicht au na kreditcharte! Wasi ide schwiiz nie wuerd mache, de polizei so antworte... Aber de ander haedmi denn eifach gfraget, ebi im usgang gsi seig und denn hani choene gah. Und de flug isch schnell verbi gange. Bin igstige, han gaesse und gschlafe und scho bini det gsi :-)

Medellín II

In mexico aglangt bini zerscht uf leon. Det hani es mexikanischs chartespiel glehrt und 5 mal in serie gunne, HI HI.

Nachdemi in tequila na e tequila-brennerei bsuecht han, bini jetzt ade pazifikkueste acho. Im moment bini in melaque, am wuchenend gahni uf maruata, det triffi luet vo leon wieder. D'straend muend hammer-schoen si und kei luet, vor allem um die ziit.

Also bis gli wieder...
Anita

León

Guadalajara/Tequila

Puerto Vallarta

News us Kolumbie

So, da bini wieder emal. Han jetzt foeteli ufeglade, isch chli lang gange, wili mi noed han choene entscheide, weli druftue und weli noed. Haed jetzt halt chli vil foeteli :-)

Ja, zerscht mal zum amazonas. Isch natuerli ganz andersch als alles woni kaenne. Woni acho bin am flughafe hani eifach losgschwitzt, das isch unglaublich gsi. Aber s'geile isch natuerli s'afluege. Denn fluegtmer eifach ueber jenschtes gebiet urwald oder was au immer und denn chunt mal en riiesefluss und denn weissmer mer isch acho. Und bi de landig gsehtmer zerscht gar noed, wos ueberhaupt platz haed zum lande. Aber es isch guet gange. S'hotel in leticia isch natuerli mega schoen gsi und fascht leer, wil um die ziit doch niemmer det higaht. Und sowieso sinds chli am kaempfe. Fuer kolumbianer ischs relativ tuer an amazonas gah, wilmer nur mitem flugzueg chan und vil uslaender haend allgemein angscht vor kolumbie. Und so luegets a jedem einzelne tourischt guet und sorged defuer daser wieder chunt und d'region allne wieter empfiehlt.

D'usflueg woni gmacht han sind de hammer gsi, vor allem ufd isla de los micos. Die affe wuessed, dass wennd luet choemed banane git und choemed azrenne. Und wennd ae banane ide hand haesch, chaschdi fascht nuem rette :-) Isch geil gsi...

Es anders mal bini go kanu fahre, im wasser zmitzt dur de wald imene fluessli und denn vo see zu see. Und im letschte sind denn die rosarote delfin gsi. Mega herzig! Ah und denn hani na ei nacht choene umtusche und bin i "cabañas" im Naturpark Amacayacu go uebernachte. Isch hammer gsi, die grueschkulisse i de nacht... Und zum schluss bini na ueberd grenze uf brasilie go schoggi chaufe fuer de cousin vom pablo. Bim cousin hani ei nacht in bogota uebernachtet, bevori wieter bin.

Am naechste tag ischs uf santa marta gange. Det zerscht 3 naecht i sogenannte "posadas ecoturisticas". Ich bi de einzig gascht gsi! Und so bini me chli wie binere familie dihei gsi, i mim eignige huetli mit terrasse und haengematte. Mega schoen det, s'einzig wo fehlt isch s'meer, aber das findtmer schnell. Defuer haeds grad naebed dra de rio piedras. Und es isch de erscht fluss, woni in kolumbie gseh han, wo richtig schoens klars wasser haed. Und au da zeigedsder immer wieder, wie willkomme dasd bisch und wie froh dass sind, dass du da bisch, usw.

Am naechste tag ischs denn grad los gange mitere wanderig zumene "Uriwohner-Dorf" (ich weiss toent bloed, aber wie seitmer dem?) Pueblito. Uiii isch die sunne starch gsi, 2 stund berguf. Und die erschte luet woni atroffe han det obe sind schwiizer gsi :-) Nachher ischs alles durab gange bis zum erschte strand und denn irgendwie e stund oder so am strand na zwuesched palme dure. Voll schoen und am abig bini kaputt gsi.

De zweit tag ischs denn i di ander richtig gange, id sierra nevada de santa marta. Wieder berguf bis zunere finca. Aber dasmal isch zum glueck na s'multier vom luis (min private reisefuehrer) debi gsi. Haemer abwechsligswies choene druf. Und wenn ich gloffe bin, ischs ihm immer so peinlich gsi, wil all luet gseit haend, er soell doch mich ufs multier lah :-) Hi hi, isch luschtig gsi. Und ich han mega vil glehrt ueber kolumbie und d'region vo de sierra nevada. Details chani denn gern mal persoenlich verzelle ;-) Uf jede fall haemmer nur na ei einzigi coca-pflanze atroffe und fruehner isch alles voll gsi i dere umgebig! Und au die wod posadas ghoered, haend fruehner coca apflanzt, de einti 12 jahr.

Denn simmer na go fruende bsueche vom luis und wiiteri Indigenas, bismer am schluss bi de finca vo ihm gsi sind. Und uf de wanderig haemer scho beschlosse, dass er mir zeigt, wiemer kokos-riis macht. Mmmh, isch mega fein! Denn haemmer koecherlet i de super-moderne chuchi vo de finca (siehe fotos). Und nach de mittags-siesta, was isch passiert? Es isch go regne cho. Und die haend sich ja so gfreut, die haend scho elend lang uf rege gwartet uf de finca und gseit, ich heig glueck bracht. HA HA. Ueberall wo ich bin regnets, eb das glueck isch!? Uf jede fall simmer denn halbe bi rege wieder zrugg zu de posadas.

Und denn am naechste tag nachdem ich de morge namal amene schoene strand verbracht han, hani wieter muesse ines bunker-hotel in santa marta :-) De rescht isch jetzt na suennele gsi. Und ich hammer vo santa marta us namal en usflug in parque tayrona goennt. Aber de abschied vo dene luet bi de posadas ischmer richtig schwer gfalle, obwohls nur 3 naecht gsi sind.

Morn gahni wieder nach medellin, mal luege, wie d'plaen am wuchenend usgsehnd. Denn na ei wuche und scho gahts wieder zrugg uf mexico und scho wieder abschied. Ah und min flug zrugg id schwiiz isch (definitiv) am 5. Juni... Bliibt also nachli ziit fuer mexico und guatemala.

Also bis bald wieder...

Da choemed d'foeteli:

Medellín

Leticia

Parque Tayrona

Letzte Fotos Mexico

San Miguel de Allende

Querétaro

Taxco

Medellín

So, ich bins wieder mal :-)

Bin ganz guet acho in Kolumbie. Bi mim flug dahi hani sogar na panama-bode betrete, zwar flughafe, aber egal...

Bin jetzt sit ere wuche da in medellín und han mich bi de tia und cousin, cousine vom pablo doefe iquartiere. D'vicky isch huet wieder heigange, aber bin natuerli gar noed elei da. Am letschte sunntig bini scho uf santa fe de antioquia gange mit de vicky und ihrem cousin. Isch mega schoen det, es kolonials doerfli, wo mega vil luet z.b. vo medellin am wuchenend higoend. Und es isch fuer kolumbianischi verhaeltnis richtig touristisch det. Haed mega vil hotels mit swimming pool usw... Das wuchenend bini in medellin.

Am maentig morge frueh gahts denn los richtig amazonas, am samschtig witer in parque tayrona und denn na santa marta selber. Alles buechet und zahlt, hi hi. Freumi! Han huet grad mit eim gredt, wo gseit haet, dases voll geil seig am amazonas. De isch vor 2 wuche det gsi und haed gseit 1 wuche seig z'churz gsi.

Und irgendwie ischs na luschtig. Ich bin da im fitness gsi und wos usegfunde haend, das ich noed vo da bin, haends mi grad voll usquetscht. Also fuer kolumbianer ischs scho na oepis speziells, wenn oeper vomene andere ort chunt. So wie ich das gsehn.

Ja, das sind d'news. Foeteli gits na kei ;-) Gaht z'lang bi dem computer zum ufelade...

Also bis bald
Anita

Ab nach Kolumbie

Sooo, wie vorgwarnt, wird ich na zwuescheddure 1 monet nach kolumbie gah. Morn morge am 6i fluegi... Es trifft sich grad guet, wil d'vicky (mami vom pablo) au grad na in kolumbie isch.

Wenn alles klappet, wirdi in kolumbie na zum amazonas uf leticia abe gah und in parque nacional tayrona bi santa marta ade kueste. Ich freui mich scho, wil die hotel vo decameron, woni hi gahn, so geil sind. Alles inklusive und so, oh oh...:-) Ja freumi natuerli vor allem ufs zmorge-buffet mit ANANAS.

Und de rest wirdi in medellin und umgebig si. Aber schrieb natuerli witerhin und au di letschte foeteli vo mexico tueni denn na druf. Aber de computer woni dra bin gsehtmer grad zwenig guet us.

Ah und s'programm, weni zrugg vo kolumbie bin, waer eigentlich na di ganz pazifikkueste abe und evtl. na in guatemala oeper go bsueche und mis zielort am schluss tulum zum nachli sunne und energie tanke... Und denn, nei das chani gar nanig usspreche, wieder hei, ufd EM. Aber alles nach kolumbie muesi zerscht na abklaere.

Ah da na d'internetsiite vom decameron:
http://www.decameron.com/

Also bis gli...
Anita

Und das war... Playa del Carmen

Fuer Sibylle und Kristina! Das waer ungfaehr alles woni han a foeteli...

Remember Playa del Carmen

Zacatecas - San Luis Potosí - Real de Catorce - Guanajuato

Ich meld mich wieder mal und wuensch allne na schoeni ostere! Ich erleb ostere mal ganz speziell, es git jenschti umzueg und si tuend na d'chruezigung naspiele. Isch voll komisch zum zueluege. Zum bispil die "procesión del silencio" das isch wienen fasnachtsumzug eifach bitz andersch und mit de ziit chli langwilig... Han bilder gmacht.

Ja ide zwuescheziit bini in zacatecas, san luis potosí, real de catorce und guanajuato gsi. Vo de staedt haetmer guanajuato am beschte gfalle bis jetzt, isch voll herzig det, haeds chlini parks, herzigi strasse, es paar gueti bars und so witer.

Zacatecas isch vor allem cool gsi, wil det sones festival gsi isch. Haed mega vil luet gha und gratiskonzert, z.B. bob dylan, aber denn bini scho wieder weg gsi. San luis potosí isch au e schoeni stadt und det bini am karfriitig gsi, denn haeds die "procesión del silencio" gha, wo recht idruecklich gsi isch.

Und denn s'coolste: Vo det us bini uf real de catorce (www.realdecatorce.net). Es mega herzigs doerfli mit vilne uslaender (vil schwizer) wo det hange blibe sind. Han det e schwizer familie kenneglernt, wo mi fascht na churzfrischtig zum chinderhuete agstellt haeti :-) Aber es isch denn andersch gange... Ja, und denn oberhalb vom dorf haeds denn na s"pueblo fantasma", e verlassni mine-stadt.

Huet gahni wieter uf san miguel de allende.

Bis bald
Anita

@ Marco Rossi: Ich han all die html-codes scho wieder vergaesse, scheisse, so schnell chas gah ;-)
@ Sibylle: Bald stelli na es paar foeteli vo playa del carmen online...


Und da na d'fotis:

Zacatecas

San Luis Potosì

Real de Catorce

Guanajuato

Barranca del Cobre

Da ja jetzt d'zugfahrt scho verbi isch und ich da in zacatecas so lang uf mis zimmer/bett han muesse warte, gits scho wieder neui foeteli vo de zugstrecki. Das isch wuerkli au wieder mal ganz e cooli erfahrig gsi, die zugstrecki. Und in Creel, im oertli woni gsi bin, haeds tarahumara, uriwohner vo det oder was au immer, und si laufed eifach na mit ihrne chleider ume, wie es jahrhundert fruehner. Das isch mega spannend...

In creel hani zwei usflueg a eim tag gmacht :-) Zerscht so jenschti stei go aluege, e chile vo de tarahumara, en see und en wasserfall. Am namittag denn zu de warme quelle, det haetmer voll is tal abe muesse laufe und nachem bade alles wieder duruf. Das isch so astrengend gsi! Und ich glaenze ja noed dur bsunders vil sport da in mexico. Aber ich bin obe acho :-)

Nach creel bini ines mennonite-staedtli. Det hani amene mennonit agluete und de und sini frau haendmer denn sis dorf und huus usw. zeigt. Das isch au ganz luschtig gsi, zum teil hani mi fasch chli unwohl gfuehlt. Die frau haed natuerli gnau gfragt, wieso ich elei umereise...

Und denn am abig in chihuahua hani oepe vier stund uf min bus muesse warte, wils d'strasse gsperrt haend waegem wind. Aber schlussendlich bini huet morge guet in zacatecas acho. Und han sogar es bett gfunde, was noed selbstverstaendlich isch i de semana santa.

also, da sind di aktuellste foeteli:

Los Mochis - Creel

Creel

Bis bald...

Roadtrip in Baja California

Ui, da bini wiedermal... Merk immer erscht, weni im internet bin, wie lang dases her isch. Jetzt hani defuer um so meh zverzelle und weiss gar noed wo afange. Drum ischs vilicht denn noed so strukturiert ;-)

Also bi puebla haeds jetzt nachli meh foetelis dinne... Nachher haedmer de eint empfohle na uf Atlixco zgah, wasi denn uf eignigi fuscht gmacht han und es haed sich mega glohnt. Das isch eine vo mine lieblingsort bis jetzt. Ich bin zwar nur oepe 2 stund det gsi, wili denn wieder zrugg han muese, aber es haetmer mega gfalle. Es isch drum au na grad maert gsi und maert sind eifach immer voll geil. Det hamer sogar na schue kauft. Ich hoffe, das isch kei marke, suscht waers garantiert e faelschig. Aber die haendmer mega gfalle. Da sind foeteli dezue:

Atlixco

Ok, und denn am naechste tag isch min flug gange und ich han na irgendwie uf das toluca muesse cho, das ischen ort ide naechi vo mexico city, wo billigfluglinie wie volaris losflueged. Irgendwie hanis denn gschafft und am naechste tag bini guet in baja california sur acho. Han eifach na ufd corine und daniela muesse warte. Die sind mit de tuerere fluggsellschaft gfloge und haend verspoetig gha.

Am naechste tag simmer denn uf die glorrichi idee cho, es auto miete. Mir haend schlussendlich fuer 5 taeg ca. 100 franke pro person zahlt. Da chamer nuet saege. Und mir sind ueberall hi cho :-) Am erschte tag simmer alles bis uf loreto duregfahre und haend det uebernachtet. Am naechste morge simmer na schnell uf mulegé, haend det denn eigentlich e anderi strass wele naeh, bismer gmerkt haend, dass die mit euisem auto wuerkli noed z'meistere isch. Es haed also ei einzigi gueti strass, womer chan waehle... Denn simmer halt wieder retour und haend denn de waeg uf puerto san carlos igschlage, wo denn am naechste morge frueh s'walbeobachte losgange isch.

Und mir muend ja so oepis vo glueck gha ha, wie euise fuehrer gseit haed. Mir haend erschtens mega vil wal gseh, denn na seeleuie und mir haend grad na en wal choene beruehre (und zwar jedi vo euis) und bim paare zueluege. Di ganz tour isch uf jede fall so oepis vo geil gsi. Euis haeds allne d'kamera abgstellt, wilmer so vil akku brucht haend :-)

Am namittag ischs denn natuerli grad witer gange bi euisem programm, mir haend ja schliesslich es auto gmietet... Und zwar uf (meh oder weniger) direktem weg z'underscht abe uf cabo san lucas. Da mer am abig z'mued gsi sind zum am "spring break" vo de amis go zueluege, haemer beschlosse na en tag me z'blibe. Fuer de naechst tag haemer au na vil vorgha, und zwar de bekannti "el arco" go aluege und det an geile strand, muend unbedingt foeteli aluege.

Am abig ischs denn uf jede fall id in-disco gange und mir haends ja so oepis vo luschtig gfunde:-) Es isch di ganz ziit hip hop gloffe und all haend so strub tanzt. Womer sind go reaggeton wuensche isch de dj chli zrugghaltend gsi und spoeter haemer usegfunde wieso. Es isch eifach niemer me am tanze gsi usser mir drue... Hi hi... Denn ischs denn gli verbi gsi mit euisem spass und es isch wieder ami-sound cho. Und mir haend euis ufs beobachte vo luet beschraenkt. Das muesmer mal erlebt ha!

Am naechste tag simmer wieder uf la paz en letschte abig go gnuesse. Wil am naechste tag haemer denn scho gli ufd faehre muesse: 16 oder 17 stund, aber mir haend euis d'ziit irgendwie erstunlich guet choene vertriebe. Was chli stoerend gsi isch, isch, dass si di erscht bar am 10i zue tah haend :-) Ah und mir haend i de bar di ganz ziit daddy yankee glost, di einzig cd womer gha haend und womer im auto scho di ganz ziit glost haend, ha ha.

Am naechste tag hani mi uf jede fall vo de daniela und corine muesse verabschiede :-) Wil ich ja unbedingt min "baranca del cobre" wet mache...


Da sind bilder vom roadtrip:

La Paz

Loreto, Mulegé

Puerto San Carlos

Cabo San Lucas

Fotis

So und da waered scho di versprochne foeteli... Sind au na grad de joel und d'petra druf, mini momentan reisebegleitig. Was leider oepe morn wird verbi si, ich tuemer jetzt denn grad en flug bueche und denn gahni zu de wal uf baja california und d'petra und de joel goend witer uf mexico city. In la paz triffi aber defuer d'corine und daniela, beidi hani au in playa del carmen kenneglernt.

Vo puebla haeds nani so vil foeteli. De kaffi isch ebe so fein da :-)
Aber ich chan denn hoffentli scho na de schoen zocalo (hauptplatz) foetele...

Bis bald, mit news vo de wal oder so...

Puebla

Xico

Xalapa

Veracruz

Veracruz - Xalapa - Xico - Puebla

So, da wieder mal es paar churzi news. Isch ja scho wieder fascht e wuche vergange, glaubs...

Veracruz isch voll schoen gsi. Vo det simmer wieter uf Xalapa, en ort wo mis reise know how buech, so gschwaermt het. Und det isch natuerli d'enttueschig cho, wilmers euis vil z'schoen vorgstellt haend. Und s'wetter isch au na grad nuem schoen gsi, waegem nordwind.

Denn haemer euis natuerli 2 mal muese ueberlegge, ebmer em reisefuehrer fuer de naechst tip seled troue. Und zum glueck haemers gmacht. Mir sind naemli ines mega schoens doerfli cho, Xico. Rund ume haeds kaffiplantage :-) De petra und em joel haed eigentlich s'doerfli gseh scho glanget, au ihne haeds gfalle, aber si haeted au choene witergah. Ich han eifach unbedingt na chli ine kaffiplantage wele. So haemer euis denn fuer en 2 stuendige usflug mit quad agmeldet. Und es isch voll lustig gsi. Ich han naemli au na de bescht quad-toeff gha :-) Am joel sine haed imer nach rechts glenkt und de petra ihre haed am schluss na gruecht... Und d'landschaft mit kaffistruech und bananebaeum isch eifach mega schoen.

Nach dem usflug haemer denn leider mis doerfli verlah und sind jetzt in puebla aglangt, was uf de erscht blick au schoen usgseht und vil gschicht dehinter steckt... Mal luege.

Foeteli choemed na, han s'kabel noed debi...

Bis gli
Anita

Tulum und wieder mal Palenque

So, da bini wieder mal :-)

Mini strandwuche mit de lucia isch leider au scho wieder verbi, es isch mega schoen gsi in tulum. Mir sind det na d'ruine go aluege und haend en usflug in xcaret-park gmacht, was uebrigens sehr schwierig isch zum uspreche ;-)

Am schluss simmer na 1 nacht in cancun gsi und irgendwie simmer vom nachtlebe fascht chli entuescht gsi... Ja und denn isch d'lucia scho wieder gange...

...Bi mir ischs wieter gange uf en ego-trip zu de isla holbox fuer ei nacht und denn na fuer en usflug is sian kaan naturreservat suedlich vo tulum. Die beide usflueg haned sich voll glohnt. Und in tulum bini so gar nuem elei gsi... Vilicht muesi det au namal zrugg gah :-)

Jetzt bini uf jede fall en teil vo de sprachschuel-gruppe go ufhole, mitem nachtbus vo tulum uf palenque. Und ich han d'vermuetig, dass bi 1. klass-bues s'gepaeck noed kontrolliert wird und bi de anderne bus scho...

Morn goemer witers fuer en zwueschestopp nach villahermosa und denn nach veracruz. Da bini sehr gspannt, wie das isch. Veracruz isch ja irgendwie glaubs recht wichtig fuer mexico.

Ah uebrigens danke vilmal fuerd kommentar, und danke an marco fuers uebersetze :-) Aber de text isch eh noed wichtig, ich han gar kei fantasie zum schriebe, d'foeteli spreched fuer sich...

Also das waers wieder mal.
Saludos de Palenque


Da sind na di neuschte fotis:

Tulum

Isla Holbox

Sian Kaan

Zurueck in Playa

Ui jetzt bini scho lang nuem is internet... Bin ebe so beschaeftigt ;-) Mues immer an strand gah und am abig furt und denn na schlafe...

Nei, ich bi wieder zrugg gange fuer 5 taeg. Die wuche sind na recht vil da, vo dene woni immer zaeme gsi bin. Naechst wuche gsehts denn wieder ganz andersch us. Aber jetzt simmers na voll am gnuesse. Am Mittwuch haemmer zwei boot mit fahrer gmietet. Das isch sonen geile usflug gsi. De halb tag chli ufem meer. Und ich han wasser-schidchroet gseh :-) Han leider nur keis foeteli choene mache. Nachher simmer an en mega schoene strand gfahre und sind det na chli go schnorchle. Grad womer im wasser gsi sind heds afange regne. Aber isch glich mega schoen gsi. Das haed sich wuerkli glohnt.

Huet abig chunt d'lucia und morn goemmer denn zaeme uf tulum. Det sels ja na schoeneri straend ha.

Ah und namal oepis:
HAPPY BIRTHDAY, YANICK
ich glaub emel das isch huet...

Das waers. Bis bald mal. Han eui nur die geile foeteli wele zeige:

Boottour

San Cristobal - Ciudad de Mexico

Nur na es paar foeteli dezue:

San Cristobal & Ciudad de Mexico

Palenque - Agua Azul - San Cristobal

Hola

Es drängt sich wieder mal en itrag uf... Da ja ä schwizerin vermisst wird in mexico. Wiä ich jetzt usegfunde han, bini glaubs sogar am gliche ort gsi. Also äs gahtmer guet, sehr guet sogar...

Palenque isch mega schön gsi, mir händ es zimmer i de nächi vo dä ruine gna bitz im wald und i dä nacht sind d'tiergrüsch so luut gsi, dasi han müäsä ipod losä zum ischlafe. D'ruine sind au voll dä hammer gsi und äs isch sooo heiss gsi, ich wet eui ja nöd nervä demit, aber ich han fascht nüm chöne laufe, so heiss isch gsi. Und bim zrugglaufe ischs voll go regne cho, voll gmüetlich gsi :-)

Ja suscht gits nöd vil zverzellä, isch eifach alles schöön womer gönd go aluege, drum tueni eifach föteli dri. Vo palenque us simmer nämli na zwei wasserfäll go aluege, wo würkli voll cool sind.

Ide zwüscheziit simmer scho wieder in san cristobal de las casas und morn gahts witer uf mexico city... Vo det wirdi wahrschinli scho gli wieder zrugg richtig playa del carmen gah, dasi na äs paar täg det han, jetzt wos cooli lüt det häd. Und dänn chunt ja scho gli d'lucia id feriä zu mir :-) Dänn gahts denn uf tulum, freuimi druf, das wird cool!

Jetzt da in San Cristobal ischs rächt chalt, wils höch obe isch. Aber d'stadt wär mega schön...

Liäbi Grüässlis
Anita

Palenque

Uxmal

Vo merida us haemmer na en usflug nach uxmal gmacht. Isch voll luschtig gsi, wilmer miteme taxifahrer gange sind. Dae haemmer denn gfragt, eber uf euis 2 stund wartet det. So haemmer euise privati chauffeur gha. Uxmal isch irgendwie mega gross, aber z.b. chichen itza di ander ruine set anschienend na vil groesser si. Defuer haeds det glaubs mega vil tourischte. Und uxmal isch wuerkli vo de luet her agnehm gsi zum aluege, vor allem fuer das, dasmer zmitzt am namittag gsi sind.

Wahrschinli gahts huet wieter nach palenque, wemer scho bi ruine sind...

Uxmal

Merida

Also mir sind tatsaechlich uf merida gange. Bin jetzt scho sit em sunntig da. Geschter simmer am abig an carneval go faeschte. Es isch eifach de hammer gsi... Voll gueti stimmig und echli andersch als bi euis. Di tacos wonich gaesse han, wuerdmer au niemmer glaube. Vorher ischs fleisch na a somene riese-spiess gsi à la kebab und nachher han ICH's gaesse :-)

Merida suscht isch herzig, aber es haet glaub na schoeneri staedt in mexico. Tourischte haeds da jetzt nuem so vil und das isch guet so. Aber defuer wirdmer halt chli bloed agluegt.

Merida

Letschti Fotis vo Playa del Carmen

Da sind na di letschte fotis zu playa del carmen:

Playa del Carmen III

Playa del Carmen & Akumal

Ich bin jetzt e Wuche ide schuel und scho isch d'helfti verbi. Bin wahrschinli scho wieder am Samschtig weg und es gfalltmer mega da. Aber uf di ander siite ischs au immer s'gliche und ich wet wahrschinli eifach da blibe, wili d'luet faengs kenne... Aber es macht mega spass da. Und am letschte samschtig simmer in akumal gsi. De strand isch de hammer, vil schoener als da in playa del carmen. Det haemer denn na sones viech gseh, heisst glaub Iguana. Voll herzig. Im meer haetmer na choene nach schildchroete go schnorchle. @Nadia: han immer a dich muese denke... Aber ich bi noed gange, han irgendwie angscht gha oder doch kei luscht oder so. Vilicht machis mal na.

Ja das waers mal fuer dae moment. Muesmer na ueberleggae wohi, dasi am samschtig wet gah. Es isch zum bispil glaubs carneval in merida, waer sicher e gueti idee. Mal luege... Meldmi denn wieder.

Da waered aber mal di neuschte fotis:

Playa del Carmen & Akumal

Mini Akunft :-)

So, ich probiers mal miteme blog, denn chani mini bilder au grad ufelade... Han scho di erschte bilder, da jetzt endli min rucksack cho isch und ich jetzt au mini verschidne uflade- und verbindigskabel wieder han...

Ja, es haed agfange im flughafe vo mexico city. Die passagier wo muend witerfluege muend anschinend sit neuschtem au durd passkontrolle. und es isch e riise schlange gsi. aber was ich natruerli nie denkt haet in mexico. si choend noed eifach oeper durelah, all muend schoen brav inere reihe stah... und so sind minute und minute vergange. irgendeinisch wirdmer nervoes... denn hani en mah gfraget, de haed gseit, ich choen bimene andere ort dure, wasi gmacht han, aber bin natuerli noed am richtige ort gsi. han wieder zrugg muese und z'hinderscht bi de reihe astah, ha ha :-) Min erschte flug isch gange gsi, ich han na hoffnige ufen naechste flug gha... Ja, woni fascht z'vorderscht gsi bin, haends denn agfange luet sueche, wo muend wieter fluege. Denn hani aber na muese terminal wechsle, etc, etc... Uf jede fall noed gschafft und jetzt haender defuer foeteli vom schoenste hotelzimmer, woni waehrend dere ziit je wird ha. E suite gsponseret vo de air france. Am naechste tag ischs denn wieter gange uf cancun und playa del carmen.

Ja nachher isch denn na die gschicht cho mit mim rucksack... Jetzt hanen wieder, es isch maentig und ich bi am friitig da gsi... Isch mega laessig ohni sini chleider uscho, mues saege ;-)

D'gastfamilie isch easy und mis zimmer au, da devo hani au bilder... D'gastfamilie isch au bekannt under «hotel gloria», wils so vil studente haend. Playa del carmen isch raecht touristisch, defuer sicher und glich na herzig. Go bade hani leider nanig choene. Jetzt isch eba au na grad dummerwiis nordwind und drum haeds huet de ganz tag gregnet. Aber set gli verbi gah und denn gits bilder vom schoene strand, obwohls halt chli vil luet haed.

Ja das waers mal, d'schuel isch eigentlich noed erwaehnenswert. D'lehrerin isch zwar guet, aber bis jetzt haed schuel de zweck nanig erfuellt: luet zum reise kennelerne. Bin mit zwei eltere herre ide klass :-) Morn seted na zwei chicas cho... Mal luege.

Also, das waer min erschte versuech gsi...
Bis bald, Anita

Erste Bilder

Erste Bilder